Танилцуулга
Манай цэцэрлэг анх 2010оны 9-р сарын 1-ны өдөр үүд хаалгаа нээн хүүхэд багачуудаа хүлээн авч Сургуулийн Өмнөх Боловсролын Сургалтын үйл ажиллагаа эрхлэн явуулж эхэлж байсан.
Бидний хувьд хүүхэд бүр эрхэм нандин учраас хүүхэд бүрийн хөгжлийн онцлогт тохирсон хүүхэд хөгжүүлэх сургалтын үйл ажиллагааг мэргэжлийн чадварлаг багш нар зохион байгуулан явуулж байна. Бид Италийн эрдэмтэн, сурган хүмүүжүүлэгч Мария Монтессорийн арга зүйг сургалтандаа хэрэгжүүлэн ажилладаг.
Манай хамт олон “ХҮҮХЭД БҮРИЙГ ЭРХЭМЛЭН, ХӨГЖЛИЙГ НЬ ДЭМЖЬЕ” уриатай, хүүхэд бүрт өөрийгөө болон бусдыг үнэ цэнэтэй, эрхэм нандин гэдгийг мэдрүүлж, бэлтгэгдсэн орчинд өөртөө итгэлтэй, эрх чөлөөтэй, эмх цэгцтэй, гоо сайхны мэдрэмжтэй бие даасан хүн буюу “МӨРӨӨДӨЛТЭЙ, АЗ ЖАРГАЛТАЙ ХҮҮХЭД” болгон төлөвшүүлэхийг эрхэм зорилго болгон ажиллаж байна.
Сургалтын онцлог
Монтессори сургалтын үзэл баримтлалд тулгуурлан хүүхэд төвт сургалтаар хичээллэх ба хүүхэд хичээлдээ сонирхолтой, баяр хөөртэй оролцож, аливаад бие даасан, эмх цэгцтэй хүүхэд болж хөгжинө.
Нийгэмшихүй харилцааны сургалтаар дамжуулан хүүхдийг өөрийгөө болон бусдыг хайрлаж халамжлах, тусалж дэмжих, бусдыг ойлгож хүндэтгэдэг зөв хүн болгон төлөвшүүлнэ.
Аялал зугаалга болон дадлага хичээл, сэдэвт тоглоомоор хүүхдүүд өөр хоорондоо дотно харилцан аливааг хамтран хийж сурах, эвлэлдэн нэгдэх, хүлцэн тэвчих, бусдыг хайрлаж халамжлах мөн түүнчлэн хүүхдийн сэтгэх чадвар болон асуудлыг шийдвэрлэх чадвар, бүтээлч сэтгэлгээг чөлөөтэйгээр хөгжүүлэх болно.
Зориулалтын урлаг заал болон биеийн тамирын танхимыг хүүхдийн сонирхол, хэрэгцээнд тулгуурлан шинээр байгуулж хүүхэд багачуудын хөдөлгөөн, эрүүл мэндийг дэмжин, хөдөлгөөний эвслийг сайжруулах, гоо зүйн таашаал олгох урлаг спортод дуртай болгон төлөвшүүлэхэд анхааран ажиллаж байна.